Puntu eta jarrai

Urteko Lehen Batzarrean, elkarteak 2026rako lehentasunak zehaztu ditu eta aldizkari berria aurkeztu du, eskubide sozialen defentsa ikuspegi feminista, publiko eta herritik indartzeko

DUINTASUNAk Usurbilen egin du bere Urteko Lehen Batzarra, egindako lanaren balantzea egiteko eta 2026rako lehentasunak zehazteko balio izan duen jardunaldian. Antolaketa kontuez harago, batzarrak ibilbide-orri argia duen proiektua sendotu du: eskubide sozialen defentsa indartzea ikuspegi feminista, publikoa eta herri ikuspegitik.

Pentsio duinak: gutxienekoak LGSarekin parekatzea

Elkarteak bere aldarrikapen historikoa berriro jarri zuen erdigunean: gutxieneko pentsioak Lanbidearteko Gutxieneko Soldatarekin parekatzea. Bizitzaren kostuaren garestitzeak milaka pentsiodunen erosahalmena higatzen jarraitzen du, eta eragin berezia du emakumeengan, haien lan-ibilbideak prekarietateak eta ordaindu gabeko zaintza-lanek markatu baitituzte. DUINTASUNAk azpimarratu du ez dela eskaera sinboliko bat, baizik eta justizia sozialaren oinarrizko auzia.

Zaintza eta osasun publikoa: eskubide bermatuak

Zaintzen esparrua izan zen batzarreko ardatz nagusietako bat. Euskal Herriarentzat Zaintza Sistema Publiko unibertsala eta kalitatezkoa bermatuko duen lege propioa bultzatzeko beharra defendatu zen, zaintzak eskubidetzat hartuz eta ez negozio gisa. Era berean, %100eko osasun publikoaren defentsa berretsi zen, berdintasuna eta gizarte-kohesioa bermatzeko, sistema ahultzen duten murrizketen eta pribatizazio zein kanporatze prozesuen aurrean.

Feminismoa eta euskara: zeharkako konpromisoak
Feminismoa ezinbesteko printzipio politiko gisa aldarrikatu zen gizarte-babeseko sistemaren egiturazko desberdintasunei aurre egiteko. Halaber, herritar guztiek zerbitzu publiko guztietan euskaraz artatuak izateko duten eskubidea berretsi zen.

DUINTASUNA aldizkaria: eztabaida eta antolakuntzarako tresna

Jardunaldiaren une garrantzitsuenetako bat DUINTASUNAren aldizkari berriaren aurkezpena izan zen, eskualdeetan zabaltzeko, hausnarketarako eta antolakuntzarako tresna estrategiko gisa sortua. Argitalpenaren helburua eztabaida soziala indartzea, pentsiodunen aldarrikapenei ahotsa ematea eta mugimenduaren mobilizazio- eta kohesio-gaitasuna sendotzea da, ikuspegi feminista eta herri ikuspegitik.

Gizarte-mobilizazioei babesa

DUINTASUNAk babesa adierazi die otsailaren 21ean eta 23an Euskal Herriko Pentsiodunen Mugimenduak deitutako mobilizazioei, otsailaren 28an Gipuzkoako Egoitzetako Senideen Federazioak deitutakoei, eta martxoaren 17an euskal gehiengo sindikalak deitutako Greba Orokorrari.

Topaketa eta anaitasun jardunaldia

Jardunaldia Internazionala eta Eusko Gudariak abestiekin i itxi zen, DUINTASUNAren oinarrian dauden elkartasun eta herri balioak berretsiz.
Batzarrak ospakizun kolektiborako unea ere izan zuen. Hitzaldien ondoren, bertaratutakoek anaitasuneko bazkaria partekatu zuten, mugimendu honen ezaugarri den espirituarekin: eskakizun politikoa eta borrokari eusten dion giza berotasuna uztartzen dituen batasuna.
Batzar honekin, DUINTASUNAk berresten du duintasuna, berdintasuna eta eskubide sozialak ez direla kontzesioak, baizik eta kolektiboki defendatu beharreko konkistak.