EZTABAIDA INKLUSIBO BATEN ALDE

COVID-19aren krisiak agerian utzi ditu pertsona ahulen, adinekoen, desgaitasuna dutenen edo laguntza behar dutenen arretan dauden gabeziak. Aspalditik eztabaidagai diren eta salatzen ari diren errealitateak diren arren, guztion aurrean azaldu zaizkigu 167 hildakorekin Gipuzkoako zahar-egoitzetan bizi izan ditugun zoritxarreko egoeren ondoren. Zainketekin lotutako hainbat testuingurutan irizpide egokia jarraituz, zaintzen eredua berraztertzea pentsatzen ari dira, bai etxeko zaintzari bai egoitzetan ematen denari dagokienez.  

Zaindu beharreko pertsonen premiei erantzun ahal izateko, nire ustez, profesional adituen, profesional esperientziadunen eta adineko pertsonen elkarteen ezagutza eta, jakina, zaindu behar ditugun pertsonen parte-hartzea erakarriko eta bilduko dituzten lankidetzako dinamiketatik sortu behar dira zainketen eredu berriari buruzko eztabaidak. Pertsona —eta ez erakundeak— helburu izango den eredu batean jarri behar da begirada. 

Gipuzkoako Foru Aldundiak talde bat osatu du. Talde hori “Gipuzkoako gizarte-ehuneko hogei bat profesionalek osatzen dute, hainbat erronkei aurre egiteko lurraldean garatu beharreko politikak aztertzeko eta berriz hausnartzeko. Erronka horien artean daude adineko pertsonen eta mendekotasuna duten pertsonen zaintza, nahi gabeko bakardadea edo gizarteratzea”.Eztabaiden ondoren, “egoitzetako arretarako eredu berri bat garatzeko agenda diseinatzen hasiko dira…”.

Aipatu nahi ditudan hainbat alderdik eman didate atentzioa.  COVID-19aren krisian, emandako eta ezagutzen ditugun egoera dramatikoak eragin dituzten gertakarien aurrean Gizarte Politiketako diputatu Maite Peña andreak erakutsitako autokritika ezagatik nabarmendu da. Eta bere hitzak, Markel Olano diputatu nagusiarenak bezala, Gipuzkoako egoitzen eredugarritasuna azpimarratzeko baino ez dira izan. Orain, hauteskunde-kanpainan murgilduta, lehen adierazitako proiektua aurkeztu du. Ondo da. Baina, taldeak gabezia batzuk ere badituela azpimarratu nahi dut. Bertan, UPV/EHUko profesionalak, Adineko Pertsonen eta Pentsiodunen eta Familien Elkarteak, Giza Eskubideen arloko elkarteak falta dira, baita geriatrak ere, adibide batzuk aipatzearren.