Pentsiodunen manifestazio handia Aste Nagusian, 1080 eurokoko gutxieneko pentsioa eskatzeko.
Bizkaiko Pentsiodunen Mugimenduak antolatuta, seigarren urtez jarraian, pentsiodunak mobilizatu egin dira eta, besteak beste, 1080 euroko gutxieneko pentsioa eskatu dute.
Hona hemen bidali diguten idazkia:
Bilboko Aste Nagusian pentsiodunen mugimendua ere kalean da
Seigarren aldiz jarraian, 2018an sortu ondoren, Bizkaiko pentsiodunen mugimenduak, gaur Aste Nagusiko astelehenean, manifestazioa egin dugu berriro Bilboko kaleetan.
Beste behin ere egin dugu, Bilboko biztanleei eta egun hauetan bisitatzen gaituztenei gure aldarrikapenak helarazteko, batez ere 1.080 euroko gutxieneko pentsioaren eskaria, ezinbestekoa baita, batez ere, miseriazko pentsioekin gaizki bizi diren emakume askorentzat.
Konpartsakideak eta beste lagun solidarioak izan ditugu lagun. Era berean, Euskal Herritik gertu dauden autonomia-erkidego batzuetako pentsiodun lagun batzuk, hala nola Asturiasekoak eta Kantabriakoak. Gure zorion beroak eta eskerrik asko eurentzat. Eta modu alai, jai giroan eta koloretsuan azaldu gara gure pankartekin, lepoko zapiekin, gure peto berdea jantzita 1.080 kopuruarekin.
Iraileko lehen astelehenean, 4an hain zuzen, Euskal Herriko Pentsiodunen Mugimenduak Hego Euskal Herriko hiriburu eta herri gehienetan egin ohi ditugun elkarretaratzeak berreskuratuko ditugu. Elkarretaratze horiekin batera, beste mobilizazio-ekimen batzuk ere egingo dira, Euskal Autonomia Erkidegoko eta Nafarroako parlamentu eta gobernuei, luzamendurik gabe, 1.080 euroko gutxieneko pentsioaren osagarria eskatzeko.
Era berean, Estatuko beste Erkidego eta Herri batzuetako pentsiodunen plataforma eta mugimenduekin batera ekimen berriak bultzatzeari ekingo diogu berriro, Madrileko Gobernu berriari pentsio publiko eta duinen aldeko gure aldarrikapenak eta, bereziki, 1.080 euroko gutxienekoa eskatzeko.
Eta, orain, konpartsek txosnetan prezio murriztuan eskaintzen diguten festaz eta pintxo- potez gozatzera. Aste Nagusian ere, berdin dio nork gobernatu, guk pentsioak defendatu!, eta ez gara geldituko pentsio publiko eta duinak lortu arte.
Aurrera pentsiodunak! Jo ta ke irabazi arte!