Pentsiodunen manifestazio jendetsua Bilbon, 1.080 euroko gutxieneko pentsioa eskatzeko
Bizkaiko Pentsiodunen Mugimenduak manifestazio handi bat deitu zuen Bilbon atzo, larunbata, Plaza Eliptikotik abiatu eta udaletxean amaitu zen.
Protestaren helburua izan zen Jaurlaritzari exijitzea aurrekontuetan gutxieneko pentsioa 1.080 eurora igotzeko partida bat sar dezala.
Mugimenduaren arabera, Jaurlaritzak aurkeztutako aurrekontuek ez dute neurri hori aurreikusten, eta EHBilduk eta Elkarrekin Podemosek aurkeztutako zuzenketak ez dira onartuko.
Sei urteko mobilizazioen ondoren, pentsiodunen kolektiboak onartezintzat jo du Gobernuan dauden alderdiek euren aldarrikapen nagusia aintzat ez hartzea, gutxieneko pentsioak duintzea eta genero-arrakala murriztea baitu helburu, hilean gutxienez 1.080 euroko diru-sarrera bermatuz 14 ordainsaritan.
Gobernuko ordezkariekin bilera ugari egin dituzten arren, ez dute aurkitu osagarri hori adostea eragozten duen arrazoi politiko, konpetentzial edo ekonomikorik, baina hori gauzatzeko behin betiko urratsa ez da eman.
Atzoko manifestazioa ohikoa ez bezalakoa izan zen; izan ere, parte-hartzaileek zuziak eta beste argi-elementu batzuk eraman zituzten euren aldarrikapena agerian uzteko.
